Federata e Futbollit të Kosovës (FFK) ka thënë se ka marrë pjesë në Kongresit e 49-të të UEFA-s që është mbajtur në Beograd, e përfaqësuar me simbole shtetërore dhe në përputhje me statusin si anëtare e barabartë në UEFA dhe FIFA.
Përmes një komunikate për media, FFK ka thënë se persona të caktuar kanë mundur të largojnë nga tavolina flamurin e shtetit të Kosovës, por që kjo thuhet se ka mundur të ndodhë pas përfundimit të mbledhjes, “kur presidenti i FFK-së Agim Ademi nuk ka qenë më në sallë”.
“Sa i përket pretendimeve për largimin e flamurit shtetëror të Kosovës gjatë punimeve të Kongresit, theksojmë se Kosova ishte e përfaqësuar zyrtarisht me simbolet e saj shtetërore, njësoj si çdo anëtare tjetër e UEFA-s. Çdo veprim i mundshëm në përfundim të mbledhjes, kur presidenti i FFK-së nuk ishte më në sallë, nuk e ndryshon faktin se Kosova ishte dhe mbetet pjesë e barabartë e këtij organizimi, ashtu siç është në familjen e futbollit evropian dhe botëror” – thuhet në komunikatën e FFK-së.
FFK ka konfirmuar se mbrëmë në Beograd disa tifozë kanë djegur flamurin e Kosovës, për çka FFK-ja ka paralajmëruar Note proteste në UEFA.
“Sigurisht, si gjithmonë, persona të caktuar ndjekin agjenda kundër Kosovës dhe largojnë nga tavolina, madje edhe djegin flamurin e shtetit tonë (siç ndodhi mbrëmë në Beograd nga tifozë të klubeve serbe), por Kosova si shtet është dhe mbetet një realitet i pakthyeshëm. FFK-ja menjëherë do të paraqesë notë proteste në UEFA dhe institucionet tjera ndërkombëtare lidhur me këto veprime, që janë kundër vlerave që promovon UEFA”, thuhet në njoftim.
Në Kongresin e 49-të të UEFA-s delegacioni i Kosovës ka qenë i kryesuar nga kryetari Agim Ademi dhe ushtruesi i detrës së Sekretarit të Përgjithshëm, Markus Weidner.
Përndryshe, Kombëtarja e Kosovës në futboll është ngritur për dy pozita në ranglistën e re të FIFA-s, për kombëtaret me të mira në botë.
